【貴賓室介紹】香港國際機場環亞優逸庭(鄰近1號閘口) Plaza Premium First In Hong Kong International Airport(Near Gate 1)
環亞優逸庭Plaza Premium First－First Class版嘅Plaza Premium Lounge，喺全球總共設有兩間分店，分別位於吉隆坡國際機場以及香港國際機場。講得佢係First Class級嘅Lounge，佢就當然有番相應嘅水準，裡面提供多項服務，例如A la carte、免費按摩、酒吧等。如果搭Economy／廉航又想入高質嘅Lounge嘅話，Plaza Premium First絕對係你嘅不二之選。
位置及開放時間
Plaza Premium First位於香港國際機場一號客運大樓離港層 6 樓，鄰近一號閘口，由T1離境大廳出發行大約三分鍾就到達，地理位置都幾方便。貴賓室營業時間為24小時，無論轉機或者早咗晚到達機場都可以使用得到。
貴賓室使用條件
- 持有可進入Plaza Premium Lounge資格信用卡（例如美國運通國泰航空尊尚信用卡、美國運通國泰航空信用卡、美國運通白金卡、Citi PremierMiles信用卡等）或通行證並支付額外HK$250
- 乘搭芬蘭航空商務艙
- 持有建行（亞洲）銀聯鑽石Prestige信用卡
- The Club白金卡會員
- 付費進入（官網訂購US$112.98）
貴賓室介紹
喺前台預約完免費按摩同埋浴室之後，相信大家第一件事都係先到Plaza Premium First最入嘅餐廳Primo，坐低嗌番個A la carte。
左：A La Carte Menu（每人限點一份） 右：Appetizer Soup & A Delights（無限制） 由於今次去嘅時候係聖誕節，所以係期間限定嘅嘅Christmas Menu。
頭盤今次揀咗份Melon&Parma Ham
主菜方面，同行朋友就揀咗個網上一致好評，一直長駐Menu嘅未來漢堡Beyond Meat Burger，雖然食落口嘅時候明顯同一般嘅肉有分別（都好正常喇），不過味道真心唔錯。
而我自己就點咗份聖誕限定嘅火雞卷，味道算係不過不失喇。
同主菜相比，個人就覺得配菜嘅Stewed mussels with pancetta, White Wine & Cream Sauce更吸引，Cream Sauce味道濃郁，配上青口簡直一流。
餐廳裡面仲有個自助沙律吧，相比起Plaza Premium lounge，呢到多咗成倍數量嘅蔬菜選擇，而且味道幾Fresh，鍾意食沙律嘅話絕對唔可以錯過。
餐廳有多項飲品可以選擇，當中個人最鍾意嘅就係新加坡名牌TWG Tea嘅茶葉，基本上次次入嚟都係嗌茶飲。如果唔鍾意茶嘅話仲有Lavazza嘅咖啡同埋普通Soft drink可以選擇。
餐廳外嘅AeroBar有多款酒類飲品供免費飲用，至於一啲較高級嘅特色酒類就要自行付費。
Aerobar同時亦都提供唔少甜品選擇
用完膳之後可以係旁邊嘅梳化坐坐，由於要額外付費嘅關係，所以大多數時間人流都唔多，比國泰嘅First Class Lounge清靜唔少。
休息區亦都有適合小睡嘅座椅使用。
另外，今次進入Lounge時預約咗Plaza Premium First嘅十分鐘肩頸按摩服務，可能由於係夜晚嘅關係，使用人數唔多，前台Staff告知半小時後就有位，比想像中快有位。呢到嘅肩頸按摩服務每個時段都有一至兩位按摩技師，今次Serve我個位男技師手勢唔錯，感覺仲好過以前Wellness嘅免費按摩同埋東南亞嘅按摩店，按完之後肩頸啲筋真係完全鬆晒，有機會嚟到一定要試試。至於浴室方面，今次等咗成個半鐘最後都用唔到，各位需要使用嘅話記得預留時間輪候。
總結
香港國際機場環亞優逸庭優點
- 主菜配菜均有頭等貴賓室水準
- 提供多款著名品牌餐飲
- 免費按摩服務
- 裝潢高貴優雅
- 人流少
香港國際機場環亞優逸庭缺點
- 浴室只有兩間
香港國際機場環亞優逸庭Plaza Premium First可以話係品質極高，絕對無伏嘅一間貴賓室，雖然持有Plaza Premium Lounge資格需額外支付HK$250進入，但個人認為裡面食物服務嘅質素完全係五星級水準，所以絕對推薦各位加錢使用；另外如果唔想畀錢入去嘅話，亦都可以努力啲儲Smart Traveller積分，以1,500積分兌換升級券進入。
–
想用信用卡儲酒店積分、飛行里數或者直接抵銷簽賬，同時又可以去旅行個陣免費入機場貴賓室？新推出嘅美國運通Explorer Card就可以一卡做到！而家就立即申請啦！
申請網址：stillmoney.com/s/Amex.Explorer
–
