【貴賓室介紹】香港國際機場環亞機場貴賓室(鄰近40號閘口) Plaza Premium Lounge In Hong Kong International Airport(Near Gate 40)

香港現時一共有三間環亞機場貴賓室,分別係需要額外付費嘅Plaza Premium First以及兩間分別鄰近1號閘口以及40號閘口Plaza Premium Lounge,而今次首次會為大家介紹40號閘口嘅一間。

鄰近40號閘口嘅Plaza Premium Lounge雖然位置較遠,但人流相對較少,而且食物選擇方面亦都較為豐富,加上設計可以遙望機場嘅停機坪,因此一向深受唔少旅客喜愛。

至於到底入面有乜嘢設施?我地而家就一齊入去睇睇。

位置及開放時間

鄰近四十號閘口嘅Plaza Premium Lounge位於一號客運大樓離港層7樓,由T1離境大廳出發跟住指示牌走,大約行十分鐘就可以到達。由於位置較偏遠嘅關係,因此需要預留番時間前往登機閘口,避免趕唔切登機(特別係需要前往其他客運廊嘅旅客)。而貴賓室營業時間為24小時,無論轉機或者早咗晚到達機場都可以使用得到。

設施

充電設施

航班展示板 報章及雜誌 浴室
餐飲美食(含素食選擇) Wi-Fi 電視

水療,按摩和美容服務

酒吧

電腦  

 

貴賓室介紹

雖然一向介紹貴賓室都係分開環境同食物介紹,不過由於40號閘嘅貴賓室食物都分得幾散,所以今次就用步移法帶大家導覽。

香港嘅Plaza Premium Lounge經常都畀人話係難民營,事實上平時早機時間人潮的確係幾誇張,試過等好耐都未有位坐,不過今次使用嘅時間就係中午時分,雖然排隊都仍然係要等唔少時間,但人流都未算話好多,不完美但可接受啦。

入到門口就會見到自助飲品區,呢到嘅飲料選項唔算多,不過橙汁、蘋果汁,熱飲、啤酒等嘅基本飲料都可以係到搵到。

呢度嘅嘉士伯機係由下向上斟嘅設計。

而旁邊嘅飲品櫃,以前係有大家最愛嘅Bonaqua樽裝水,但而家已經再無提供,只有啤酒同埋維他奶,以後再無得拎水係飛機上飲了。

往右邊行就會去到最靠近現點區嘅座位,由於位置便利所以大多數時間都幾Full。

旁邊就係停機坪,啱晒鍾意睇飛機嘅朋友。

食物方面,穀物類小食、曲奇同糖果幾乎每間Plaza Premium Lounge都有,就唔多介紹。

麵包方面,老實講香港Plaza Premium Lounge嘅選擇都幾頹,計埋方包總共都係得四款麵包可以揀。另外格離有個櫃放咗生菜、蕃茄、芝士等三文治材料,有興趣嘅話都可以自製番個嚟食。

而另一張枱就擺滿咗熟食,每段時間都有大概六七道料理可以揀。

至於自助熟食質素雖然算唔上好食,但都食得落,間唔中會有一兩道菜會係預期之上咁,唔好抱太大期望嘅話會比較好。

再行前多少少就會到達一個角落,除咗有飲料、湯、沙律吧、炸物之外,最重要嘅現點料理都係呢個位置。

每個國家嘅Plaza Premium Lounge都會有當地特色美食,而香港Plaza Premium Lounge最出名嘅就係即煮嘅香港地道魚蛋粉,水準可以話係同唔少出面嘅名店相約,嚟到絕對不得不吃。

除咗魚蛋粉之外,現點區仲有幾道港式菜可以揀,今次嚟到就有素菜米粉、冬瓜粒瑤柱湯飯同埋港式蒸腸粉。

講完右邊嘅設置同美食,就去番入口往左嘅方向,呢邊嘅座位桌上就有提供唔少充電位,想叉下電嘅話呢邊設計就會方便啲,不過要拎熟食就略為有點遠。

Plaza Premium Lounge老是常出現嘅六角形單人座位,想靜靜地辦公或者休息嘅話呢個位就一流。

雖然Plaza Premium官網無寫有電腦提供,但其實行前多少少會見到有兩部電腦可以用。

而前方呢個區域以前係唔開放,相信係隨住人流愈嚟愈多嘅關係,係2019年終於亦都開放使用。

相比起現點區,呢一邊嘅空間寬敞唔少,唔洗坐得密密麻麻同人逼,加上旁邊都有小食同埋飲品供應,食完正餐有時間嘅話嚟呢邊坐都唔錯。

飲品區

小食

旁邊有三樣炸物供應,分別係咖喱角、素菜春卷同埋酥炸三角糰。

而擺放炸物嘅另一邊,其實係一個小型酒吧,除咗有酒精飲品提供之外亦都有個凍櫃,擺放三文治同甜品,係到一路飲酒一路食甜品都幾Chill。

Plaza Premium Lounge免費提供嘉士伯啤酒,如果想飲高級啲嘅酒就要額外付款啦。

三文治同甜品,三文治用保鮮紙包住,趕時間嘅話拎上機食都無問題,而且仲有唔同味道可以揀;而甜品賣相好過以往嘅七彩蛋糕唔少,至於味道由於無試就解答唔到,大家有試嘅話都可以係留言分享番味道如何。

 

總結

香港國際機場環亞機場貴賓室(鄰近40號閘口)優點

  • 人流相比1號閘口嘅Plaza Premium Lounge少
  • 熟食選擇唔少,而且現點嘅魚蛋粉都幾高質
  • 空間頗大
  • 有浴室可以使用

香港國際機場環亞機場貴賓室(鄰近40號閘口)缺點

  • 無咗樽裝水
  • 食物水準仍然差過其他國家嘅環亞一截

如果對食物水準要求唔高嘅話,其實40號閘嘅Plaza Premium Lounge都可以滿足晒基本嘅需求,食物都幾多選擇之餘而且幾有港式風味,加上浴室、電腦、書、雜誌同埋按摩服務都有齊,作為一間平民貴賓室嚟講可以話係合格有餘,如果未持有美國運通Explorer Card嘅話不妨考慮申請番張,上機前嚟到飲杯啤酒食番個魚蛋粉,喺到達目的地前優先享受愉快嘅假期。

貴賓室使用條件

  • 持有指定信用卡(例如美國運通Explorer Card、美國運通白金卡、Citi PremierMiles信用卡)
  • 持有Priority Pass
  • 乘搭合作航空公司的商務艙或頭等艙
  • 付費進入(官網訂購US$75)
  • 使用Arrture積分兌換貴賓室使用券

想用信用卡儲酒店積分、飛行里數或者直接抵銷簽賬,同時又可以去旅行個陣免費入機場貴賓室?新推出嘅美國運通Explorer Card就可以一卡做到!而家就立即申請啦!

申請網址:stillmoney.com/s/Amex.Explorer

You may also like...