訂日本酒店好選擇 樂天Travel 詳細教學

香港人訂酒店大多都會用Hotels.com、Expedia同埋Agoda等等嘅酒店網,但其實如果識得用番當地嘅訂房平台,除咗有機會平唔少之外,仲會多好多選擇,今次就為大家講解吓如何使用樂天Travel。

首先第一步先前往日本樂天Travel網站:https://travel.rakuten.co.jp/
注意番係日本版!雖然有中文版,但相對地少好多優惠同選擇!

登記會員

入到去之後首先登記做會員,首先按会員登録

入到去選擇今すぐ会員登録(無料)をする

入到去可以揀英語或者簡單,簡單填一啲資料就可以完成申請。如果你係香港居住,Postal Code請填000-0000,Prefecture請填Other,無日本電話的話就填+852之後自己嘅電話號碼。

填晒再確認就完成架喇!

搜索酒店

去番官網按ログイン登入之後,有正式開始搜索啦!最常用嘅搜索方法有三個,分別係左上角嘅キーワードから探す(搜索Keywords)、日付から探す(從日期裡搜索)同埋地図から探す(從地圖裡搜索)。我建議如果未有心水酒店嘅話,從地圖到搵會比較好。

先假設今次我地要搵東京嘅酒店,首先揀番首都圈,再選擇東京。如果唔知自己去嘅地方屬於邊一個地區的話,可以用Google Map睇下日本地圖,又或者用Mouse睇嗰個地區包含邊幾個縣。

入到去再揀選要住嘅區,我地今次就揀選東京23区。

入到去之後再揀選細區,如果覺得地圖有啲亂嘅話你可以直接右邊揀想住嘅細區。

入面去終於可以揀酒店啦!建議你可以係左邊填埋入住資料先,包括チェックイン(Check In日期)、チェックアウト(Check Out日期)、ご利用部屋数(房間數量)、1部屋ご利用人数(一間房幾多個人住,子供即係小童)、宿泊地(我地啱先已經粗略揀咗,但想再仔細Search新宿地區嘅就由全域揀)同埋合計料金(1泊)(合計料金即係住宿總共嘅費用,泊即係晚,如果Budget幾多都得嘅話可以唔填)。

輸入完之後,如果你想依位置嚟揀酒店,可以揀選地図上に表示(地圖上查看酒店),不過我就唔太建議。施設ごとに表示(按設示查看)會比較有用,而施設ごとに表示亦有四個選擇,分別係おすすめ順(由網站最推薦嘅開始順序)、料金の安い順(由價錢最平嘅開始順序)、料金の高い順(由價錢最貴嘅開始順序)、評価が高い順(由住宿過嘅客人佢地畀嘅評價最高嘅開始順序)同埋部屋が広い順(由房間最大嘅開始順序)。我就覺得評価が高い順最好用,日本人嘅評分唔會好似香港食評網咁亂畀。

 

㩒完評価が高い,佢就會由最高分嘅酒店開始排列,想睇個間酒店更多資料就㩒酒店名,如果想篩選嘅話,可以係右面揀,詳情可以參閱下圖。

入到去如果酒店資料無問題嘅話就可以訂房啦!

按プラン一覧會睇到唔同Plan畀你揀,有時候某啲酒店會有特價Plan,條件係只可以揀用現金畀錢,記得睇清楚條件先好㩒預訂。當你揀到心水Plan嘅話就可以按予約繼續。

確認番訂房資料同埋每日房間嘅價錢

 

登入咗嘅話宿泊者資料佢會自動幫你填,チェックイン時刻即係Check In時間,無乜問題嘅話碌落下面繼續。

係Check Out後十日內就會獲得相應嘅樂天Point,可以係之後訂房時用番,1Point=1Yen。

 

支付方面,上面講過大部份酒店都可以選擇信用卡或者現金付款,信用卡嘅話可以揀Visa/Master/AMEX/JCB同埋香港冇嘅Diners信用卡。

每間酒店嘅取消政策都唔一樣,記住預訂前要仔細睇清楚

去到呢個重要嘅紅色框,佢會講如果取消預訂所需要嘅費用。以上圖為例,住宿日期前一日開始取消就要收取費用,注意番日文嘅「前日」係指「前一日」。假設預訂呢個Plan嘅話,如果我地係住宿前兩日取消,咁就唔需要收取任何嘅取消費用。如果無問題嘅話就可以㩒下面嘅上記の内容で予約する。

完成予約!樂天Travel會寄一封確認信去你嘅Email,如果想查看或者取消嘅話可以去番個人ページ到處理。

取消預訂酒店

首先到樂天Travel官網,按右上角予約の確認・キャンセル前往個人頁面。

個人頁面裡面可以睇番現有嘅予約內容,部份Plan會有付費方式變更嘅選項,需要縮短住宿嘅話可以揀日程短縮。而今次我地要取消住宿,所以就要選擇キャンセル。

去到キャンセル嘅頁面,首先會顯示今次取消預訂酒店嘅內容。

之後會顯示取消所需嘅費用,如果以上日子都不適用嘅話咁就毋須付取消費用,不過用信用卡付款嘅話,由於付款同退款係跟番當時嘅匯率,所以有會一定嘅差額。另外如果有需要嘅話可以係空格內填寫取消嘅理由。

再往下就會見到一室キャンセル,按右面嘅一室キャンセル就可以完成取消手續。

取消預約完成!如果之後想睇番過去嘅預訂記錄,只需要去個人ページ嘅キャンセル済み‧過去の予約就會見到架喇。

 

領取Coupon

先前往官網首頁,下方你會見到クーポン(Coupon)呢個字就㩒入去,每次都有唔同嘅Coupon可以拎,分別有酒店、航空、租車、巴士、的士同套票等嘅Copon可以拎,如果你見到「事前配布中」即係事前發分發Coupon,未用得但可以拎咗先,每張Coupon都有數量限制架。

入到去你會見到唔同種類嘅Coupon,佢地嘅使用條件同日期都各有不同,同埋並唔係間間酒店都可以用到Coupon,想知Coupon可以用係邊間酒店到,就㩒入去クーポンの対象施設をチェック(檢閱Coupon可以用係邊啲設施)。

入到去會見到可以用嘅酒店,當Coupon可以用嘅時候就會係クーポン利用個到選取到架喇!

正常係呢個位置會顯示出嚟,不過由於試範時未有Coupon可以用就無顯示到。

 

You may also like...