官網訂酒店唔一定貴 Best Rate Guarantee BRG 教學及實例
相信大家係預訂酒店嘅時候都有見過最佳價格保證Best Rate Guarantee（BRG）呢個字眼，但大家又有冇好好咁運用呢個權利呢？唔少人都認為官網訂酒店一定貴過第三方酒店平台，但其實事實係喺官方途徑預訂會更抵？如果你想喺訂酒店時可以慳唔少錢嘅話，就一定要學識善用Best Rate Guarantee啦！
Best Rate Guarantee 教學
其實唔少嘅大型連鎖酒店都會有Best Rate Guarantee，只需要係官方途徑預訂酒店後*係指定時間內係第三方（例如Hotels.com、Booking.com、Expedia等）搵到更平嘅價格，就可以向酒店申請BRG，酒店除咗會將價格下調到第三方嘅價格之外，仲會有額外嘅補償，而補償大多數都係折扣優惠同酒店積分。
好似好簡單咁，不過有一點好重要嘅係，官網同第三方搵到房間條件必需一樣，先會成功申請到BRG，當中條件包括：
- 酒店相同
- 住宿日期相同
- 住宿人數相同
- 房型相同（普通房／套房／城景房／海景房／高樓層房）
- 床型相同（單人床／雙人床／雙床房）
- 取消條款相同（可以限期前退款／不能退款）
- 早餐／泊車／其他福利
至於點樣搵第三方酒店嘅價？其實都係不外乎Hotelscombined、Trivago嗰啲酒店搜尋引擎，注意番如果兩者差價少於1%嘅話唔少酒店都會唔批准BRG申請。如果所有條件相同嘅話，就可以正式向酒店申請Best Rate Guarantee！順帶一提，永安係唔可以用嚟做BRG架！至於點解可以（按此）睇番呢篇文章。
*部份酒店集團唔需要預訂酒店已經可以申請
申請Best Rate Guarantee酒店連結及補償
以下會列舉四個大型酒店品牌嘅連結同補償條款，但可以做BRG嘅品牌絕對唔限於呢四個。
Marriott
申請BRG時間：官方途徑預訂酒店後24小時內，入住24小時前。
成功BRG補償：下調到第三方價格，並自行選擇獲得額外 25%OFF 或 5000 積分（積分會於入住後給予）。
Design Hotel則選擇額外 20%OFF 或 5000 積分（積分會於入住後給予）。
注意事項：部份酒店並不適用，詳情可參閱Marriott Bonvoy 網址（按此）
申請BRG連結：按此
酒店回覆是否成功時間：24小時內
Hilton
申請BRG時間：官方途徑預訂酒店後24小時內，24小時內入住之Booking需要打上Hotline申請。
成功BRG補償：下調到第三方價格，並獲得額外25%OFF。
申請BRG連結：按此
Hyatt
申請BRG時間：官方途徑預訂酒店後24小時內。
成功BRG補償：下調到第三方價格，並自行選擇獲得額外 20%OFF 或 5000積分（積分會於入住後給予）。
申請BRG連結：按此
IHG
申請BRG時間：官方途徑預訂酒店後24小時內，入住24小時前。
成功BRG補償：下調到第三方價格，並獲得五倍酒店積分（上限40,000分）。
申請BRG連結：按此
Shangri-la
申請BRG時間：官方途徑預訂酒店後24小時內
成功BRG補償：下調到第三方價格，並獲得額外10%OFF。
申請BRG連結：按此
萬豪Marriott BRG成功案例
話說小弟本身會係1月頭去日本旅行，咁行程就包括北海道嘅函館，咁係揀酒店時就對位於JR函館站附近嘅Four Points by Sheraton Hakodate有啲興趣，而又發現第三方嘅價格平過官網，所以就預訂同嘗試申請BRG。
入到去Four Points by Sheraton Hakodate揀完日期、人數同房間數量之後，第一件事絕對唔係揀房型，而係揀要咩Plan！Prepay and Save嘅房雖然平啲但多數係無得退款，而Standard Rates就可以取消，至於Deals and Packages就係睇你想唔想買早餐。記住要成功BRG就一定要所有條款一樣。
由於我喺第三方酒店買搵到更平嘅價格，佢嘅條件係可退同無早餐，加上我都想要可以限定前退房免費嘅條款，所以就揀咗Standard Rates，並且揀咗Cozy Guest Room, Guest room, 1 Double呢隻房型。
訂房完成！下一步就係去搵更平嘅酒店價格。
今次本人分別以Agoda同Hotels.com嘅價錢分別做第一晚房晚同第二晚房晚嘅BRG，至於點解無一次過BRG係因為Agoda第二晚嘅價格並無低於官網，所以第二晚房價無得下調下75折，後來係Hotels.com搵到第二晚更平價格，所以就要求以Hotels.com嘅價進行第二晚BRG。官網嘅Cozy Guest Room, Guest room, 1 Double喺Hotels.com即係Standard Double Room。而由於我地係揀咗可退條款無早餐條款，所以會以上面個價格去申請BRG。
㩒入去預訂就會睇到Hotels.com連稅後嘅價格，官網會員價格都要40,866Yen，而Hotels.com就只需37,598Yen，而且條款一樣，吻合做BRG嘅條件。
跟住就去番Marriott到填BRG Form，最後可以揀75折定5,000萬豪積分，而我今次就揀咗75折。
最終回覆Email話成功！而兩晚房價由原來嘅40,866Yen，下降到第三方價格後再75折，最終只需要畀26,387Yen！平咗14,479Yen即係成千港紙有多！
官網可以登入睇番張訂單，價格已經改為BRG後價錢。Marriott嘅BRG絕對唔難，大家有機會都可以試吓！
希爾頓Hilton BRG 成功案例
Hilton嘅BRG一直都畀人話係較難申請成功，而筆者就曾經試過入住前一日先係官網訂兩晚DoubleTree by Hilton London Greenwich，酒店官網訂房103.69歐元一晚，而Hotels.com就89.1歐元一晚，上網填完Form之後收到客服回覆，由於入住時間不足24小時嘅關係，需要打上Hotline申請，而之後Hotline亦都話處理唔到，需要到達時知會酒店前台，到達酒店前台時就叫筆者補番E-mail去酒店， 最終成功以66.83歐元嘅價格成功訂到DoubleTree by Hilton London Greenwich！兩晚夾埋終共慳咗73.72歐元！即係大約HK$630！
總結
一直以來唔少人都會覺得官方途徑訂會貴啲，但其實如果識得玩BRG嘅話，係官網訂酒店先係最抵，而且仲可以慳番唔少旅行錢！大家以後訂大型連鎖酒店，如果有Best Rate Guarantee嘅話都不妨花時間格吓價，話唔定會有意外嘅收獲！
–
想用信用卡儲酒店積分、飛行里數或者直接抵銷簽賬，同時又可以去旅行個陣免費入機場貴賓室？新推出嘅美國運通Explorer Card就可以一卡做到！而家就立即申請啦！
申請網址：stillmoney.com/s/Ae_Explorer
–
