【貴賓室介紹】台北桃園機場環亞機場貴賓室（第2航廈離境大堂A區）Plaza Premium Lounge In Taiwan Taoyuan International Airport (Zone A, Terminal 2)

A區嘅貴賓室分為多個區域，係門口位置已經有數十個座位，而當中呢個梳化連電視嘅位置都可以話係最受歡迎，啱晒一家大細一齊坐。

旁邊有長桌，自己一個又唔鍾意坐入面嘅話都可以考慮用吓。

 入面用餐區嘅座位

貴賓室照舊門口位置有航班展示版、報紙同雜誌，呢個就唔多講。而現煮區就係入口位附近，由於呢個區域係用餐區，所以座椅都用上方便進食嘅設計。

Lounge入面有電視可以睇

而往前走就係梳化區域，因為好多旅客都會係呢區休息，所以燈光亦都相對較暗。  

而呢間貴賓室嘅特色之一就係設有私人休息區，雖然價錢都頗貴，一般嚟講都無乜人會用，但如果想喺機場有張床瞓嘅話都不失為一個好選擇。（官網預訂6小時US$144，12小時US$192）

房間設計簡約得嚟不失時尚感，以機場住宿嚟講都算唔錯。（圖片取自官網）

而貴賓室內亦特別設有貴賓席，畀私人休息區嘅住客使用。

最後仲有個Meeting room，如果有需要嘅話可以加錢使用，不過相信都無乜人會特登嚟貴賓室開會。

介紹完啲座位，咁就講番大家最關心嘅食物。沙律吧方面都有唔少選擇，最特別應該係有枝豆可以揀，而蔬菜都幾新鮮，無咩特別。

麵包款色唔多但都有幾款可以揀。

現煮區，除咗有熟食可以order之外，亦都放咗幾部自助添飲機。（咖啡機、橙汁、蔓越莓汁、啤酒機以及汽水機。）

而每間Plaza Premium Lounge都會有該國出產嘅茶包，而台灣就係港人熟悉嘅天仁茗茶。

正所謂「燃點香煙喝啖酒，所有不快都溜走」，上機前飲番杯生啤，係飛機上都易瞓啲。

另外餐車上亦都擺放咗紅白酒。

而罐裝飲品、甜品同水果就放晒係雪櫃入面。

甜品味道都喺A1區環亞到講過，真係唔太好食唔需要特別試。

當日嘅現點料理餐牌，由於筆者要同一日跑晒桃園四個環亞貴賓室，所以係呢間並無點到餐，不過根據個人經驗，其實四間Lounge水準相約，無話邊間特別好食。

自助熟食區方面，食物種類比其他三間桃園環亞Lounge多，而且都有用食物盤蓋住，感覺比較衛生。另外仲有幾款熟食，不過咁啱影個時未Fill，所以就無圖。

而呢到亦都有老火湯可以飲，啲料都幾足。至於西湯當日係呢間貴賓室就無出現到，但係Terminal 1嘅兩間就有提供，所以如果唔啱食又有時間嘅話都可以走多幾間環亞睇睇。