齊來學Stopover
到底咩係Stopover？其實好簡單，只要係一段旅程入面：
A) 停留一個地方時間多於24小時
B) 而又並非最終目的地嘅話
就會被歸類為Stopover。
而Asia Miles每個單程都會送一個免費嘅Stopover，上一篇台北頭等+札幌經濟就係善用Stopover嘅玩法。由「台北」去「香港」，將「香港」視為Stopover，再由「香港」去「札幌」，咁就可以當兩個旅程咁出發。就算隔近一年（例如Asia Miles最長360日，出票日開始計），再去埋餘下嘅旅程都無問題。
22000里換單程馬爾代夫加日本
咁遠少少嘅又可以點用呢？例如港人熱愛嘅渡假聖地馬爾代夫，如果用Asia Miles換單程需要22000里，而Avios只係需要12500里，係咪代表Asia Miles就唔抵換呢？
其實可以咁，Asia Miles中途嘅哩數（飛行距離）上限係5000，只要善用Stopover，回程票就可以用22000里換：
馬爾代夫(MLE)－＞香港(HKG)(2976哩數)（stopover）
香港(HKG)－＞東京成田(HND)(1805哩數)
而東京亦都可以換變做日本嘅其他地方（除札幌），即是換多程免費香港飛日本。不過注意番，馬爾代夫去程同東京回程就要另外換。
再舉多個例，長途機票嘅哩數上限係7500，而香港同溫哥華嘅距離係6392哩數，就咁換單程會蝕咗1108，其實可以咁：
溫哥華(YVR)－＞香港(HKG) (6392哩數)（stopover）
香港(HKG)－＞曼谷(BKK)(1049哩數)
一樣42000里就換到，等於免費多一程香港飛曼谷，冇理由唔換埋佢吖！
32000里 遊杜拜 停孟買！
如果唔分開兩個旅程，而係一個trip想去兩個國家，又可以點做先最抵呢？
我用杜拜做例，本身Asia Miles香港杜拜來回已經要44000里，但如果中間加多站，比如印度孟買，用stopover方法可以咁樣買兩個單程：先由香港經孟買（stopover），去杜拜（單程）然後回港（單程）。
即是：
香港（HKG）－＞孟買（BOM）（stopover）
孟買（BOM）－＞杜拜（DXB）（合共3856哩程）（22000里）
杜拜（DXB）－＞香港（HKG）（3684哩程）（22000里）
合共44000里，同去杜拜來回所需里數一樣，但去埋孟買！
但咁都未叫最抵，如果我地可以善用stopover兼用盡每個區域上限距離，就可以咁樣換：
香港（HKG）－＞孟買（BOM）（2658哩程）（10000里）
孟買（BOM）－＞杜拜（DXB）（stopover）
杜拜（DXB）－＞香港（HKG）（合共4882哩程）（22000里）
最終只需要32000里就換到成套機票，真係終極抵！
Asia Miles 區域距離計法
32000里一次過去杜拜同孟買，仲平過單換杜拜來回（44000里），計法講過喇，重點係區域距離上限。
首先我哋要睇番「亞洲萬里通」獎勵換算表，佢分好多個嘅，由超短途到超長途都有，同今次有關嘅分別係：
短途，751－2750哩程
中途，2751-5000哩程
同一個里數，梗係愈貼近飛行距離上限就愈抵，盡量要令每段機票都可以食盡。頭一個單程：
香港（HKG）－＞孟買（BOM）
距離係2658哩程，而短途哩程上限係2750，所以會被納入短途計算，只需10000里。
下一程將杜拜當做stopover：
孟買（BOM）－＞杜拜（DXB）
杜拜（DXB）－＞香港（HKG）
兩程夾埋4882哩程，僅僅唔超出中途上限5000哩程，22000里搞掂，埋單32000里。
你可能會問，咁點知兩個地方距離幾遠？我通常用GCMAP，輸入機場代碼就知道地區之間嘅距離，一啲都唔難，難在諗點拆開個Trip。
