Google ITA 用法
有冇聽過Google ITA呢？冇？咁有聽過Skyscanner喇掛！其實Google ITA都係一個機票嘅搜尋引擎，可以形容為一個進階版嘅Skyscanner，差在冇提供買機票功能。
叫得進階，當然其他搜尋引擎有嘅功能佢都有啦，講緊係單程、來回、多目的地嘅機票喺指定旅遊日期嘅搜尋，要選擇唔同嘅旅客人數，唔同嘅客艙等級當然冇問題啦。
完成搜尋就會見到個清晰嘅表格，上面顯示各航空公司直航同轉機最平嘅價錢，下半部分就係各個搜尋結果嘅詳細資料，包括搭邊班機、幾點出到幾點、航程、仲有最重要嘅價錢。
下一步就係上其他機票網，例如Skyscanner、Kayak等等，睇下搵唔搵到頭先嘅航程，搵岩就可以俾錢訂喇。
睇左咁耐都未見到有乜特別，仲要上另一個網先訂到，到底點解要推薦Google ITA？因為佢有啲人冇佢有嘅功能，例如多個起點目的地搜尋、唔同銷售地方都可以搵埋。
Google ITA 一次搜尋多個目的地
大家有冇試過想去一個國家或者地區，但冇特別想去邊個機場呢？例如想去日本本州，去東京、大阪、名古屋都可以。喺其他機票搜尋引擎上，大家只能逐個地方或者機場查返有咩機可以去到，例如用Skyscanner就要分三次睇：
1. 東京成田、羽田
2. 大阪關西
3. 名古屋中部
但Google ITA就可以一次過Search多個目的地。
首先輸入其中一個目的地KIX，跟住揀「Nearby」，就會見幾個距離選擇，由25到2000里都有。主要睇自己覺得隔幾近先叫附近，揀200里就見到NGO，去到500里會見埋HND、NRT。
揀完可以去嘅機場之後，目的地欄就自動填好KIX, NGO, HND, NRT，當然高手一開始就可以自己打啦！事不宜遲揀埋日子人數就去搜尋，跳入去搜尋頁面可以一次過見到香港飛呢四個機場嘅航班資料喇！
Google ITA 超實用功能
Google ITA於行程編排仲有更加複雜用法，除咗揀起點終點，仲可以加各類型條件。譬如今期想搭新航、漢莎、ANA所屬嘅星空聯盟，只要加一句」ALLIANCE star-alliance」就可以。又或者去一程歐洲，但唔想杜拜轉機，加個」~DXB」就攪掂。仲有好多意想不到嘅條件可以加，所以佢先咁強大。
同埋唔係淨得航程呢啲花巧嘢，日期都有，如果知道邊日去同返，但純粹想望埋早一兩日有冇平，可以揀前後一、兩日，Total搜尋最多5日去同5日返嘅組合。
另一個模式就係先set好trip嘅日數，再揀一個指定日期，佢就會列晒嗰日之後一個月嘅搜尋結果畀你睇。啱晒嚟緊準備放長假，邊日出發都OK嘅朋友。
仲有個超實用功能，唔同城市用唔同貨幣買機票，兌返港紙條數都會唔同，Google ITA可以揀出票城市同貨幣，等你可以擺埋一齊比較。
Google ITA 實例分享1
講左咁耐理論都悶喇，即刻開始實戰！
打工仔得嗰十幾日AL，冇乜事都唔想請咁長假，如果突然想3月頭搵個周末攞多兩日假去個日/韓trip，應該請頭定請尾呢？同埋去邊度好？
用Google ITA，第一步揀去邊。用Nearby搜尋，目的地填住KIX先，佢算係日韓一帶偏中間嘅機場，帶個頭盔先，目測咋。揀1000miles內，個範圍會好闊連溫州、俄羅斯等老連咁遠嘅機場都見到。因為計劃去日韓，大約距離KIX 600里內就包晒全部，其他機場就要人手勾走。其實嫌麻煩係可以人手打幾個主要機場，例如ICN, PUS, KIX, FUK, HND等等。
行程部分揀好，下一步係日期，若果用3月9號去、10號返，疊住個周末假期外加前後兩日去搜尋，結果會包括7-11號去、8-12號返。雖然有部分搜尋結果唔啱洗，但都包得晒想要嘅嘢，最早會7號去、可以玩到10號，最遲9號去、12號返，總之目標只請兩日AL假啦！。
搜尋結果頁冇特別，就係多個日期目的地嘅大匯集囉。試吓揀17號晏晝飛首爾、21號晏晝返，大韓機，每位$2100港紙有找。跟手試下首爾出票，Sorry，冇得賣，咁試下澳門出同一樣嘅機，MOP2431，即HK$2360，貴啲啫。
攪完一大輪，可以上其他機票網買埋就收工。試咗3個網：Skyscanner，Kayak同Momonda：
Skyscanner：HK$1787
Kayak：HK$1825
Momonda：HK$1825
搵到仲平咗，啱價可以碌卡畀錢。
呢度見到Google ITA嘅不足就係冇得直接出飛，同埋個價同出面未必一樣，記得貨比三家呀！
Google ITA 實例分享2
再分享一位網友嘅經驗，佢嚟緊四月出trip去英國，做完公事後想趁復活節假走轉東京Shopping。
咁點樣用Google ITA搜尋？
首先揀Round Trip啦，起點香港（HKG），目的地倫敦（LHR），去程要求好簡單，只求一程過唔轉機，所以Outbound Routing Codes填」N」就得。
回程複雜少少，因為要去東京，所以Return Routing Codes填」TYO」，羽田成田都包晒。但如果就咁Search會變成一去到日本就要即刻排隊返香港，所以可以加個」MINCONNECT 60:00″落Return Extension Codes度，意思係中間轉機至少要相隔60小時，兩日半夠買嘢啦！
日期佢揀左4月7號前後兩日去，同埋指定4月19號返，因為要疊到個復活節假。
搵到最正條飛就係7號半夜機去倫敦，復活節假第一日19號一早飛羽田，22號黃昏帶埋戰利品由成田返香港，全程盛惠$13295。順手望吓其他地方出票有冇平到，可惜倫敦同東京都搵唔到第三程，算啦公司錢慳唔到就算。
最後走去Skyscanner同Momondo買飛，兩間都係$13299，OK攪掂，買得！
