【貴賓室介紹】台北桃園機場環亞機場貴賓室（第1航廈離境大堂C區）Plaza Premium Lounge In Taiwan Taoyuan International Airport (Zone C, Terminal 1)
介紹完Terminal 2嘅兩間Plaza Premium Lounge之後，今次就帶大家番到Terminal 1，Terminal 1一共有兩間環亞Lounge，分別位於C區同D區，雖然講就話係唔同區，但事實上兩者都係位於4樓位置，而且相隔路程更係三十秒都無，如果有時間又想探索一下嘅話都可以去晒兩間，順便儲吓Arrture積分換禮品。
至於邊間好啲？我個人就覺得差別唔大，純粹係營業時間唔同，以及有冇浴室供應，硬要講嘅話D區係優勝少少。唔講咁多，而家就立即為大家介紹C區環亞Lounge。
位置及開放時間
桃園機場一共有四個環亞Lounge，分別係A1區、A區、D區，以及今次介紹嘅C區。
C區Lounge位於Terminal 1嘅四樓，由T1過關後走大約四分鐘就可以到達。順帶一提，C區同D區中間夾住一個環亞嘅免費貴賓室，唔洗畀錢同持有指定信用卡都可以免費使用，想搵個地方免費坐吓充吓電嘅話，去嗰到就啱晒。
營業時間：06：00～22：00
設施
| 充電設施 | 航班展示板 | 報章及雜誌 |
電視 |
| 餐飲美食（包括生啤及素食選擇） | Wi-Fi |
|
貴賓室介紹
貴賓室門口，入嚟個時記得用Arrture儲分（圖片取自官網）
Lounge嘅門口位置照舊都係有報紙雜誌同航空展示版
近門口位置嘅貴賓室座椅
到訪時間大約晚上八點，雖然C區Lounge面積唔大，但使用嘅旅客非常少，成個Lounge唔多過十個人。
一如以往裡頭係梳化區位置，上機前可以係到小睡一下。
而近自助區嘅位置則係卡位設計，不過座位背部位置就唔係梳化位。
介紹完環境之後，就講番提供嘅飲食，Lounge由於較細嘅關係所以無麵包區，而沙律吧同甜品係放埋一齊，選擇都少過T2 A區Lounge唔少。
而飲品同另外三間台北嘅環亞Lounge無異，都係紅白酒、台式罐裝飲品、牛奶、蔓越莓汁、天仁茗茶茶包、咖啡機、啤酒機以及汽水機。
自助啤酒機
至於自助熟食方面，一共有五款菜式，當日分別係炸雞、青椒牛肉炒飯、炒青菜、茶葉蛋以及魚柳。係到試咗食炸雞，可能由於擺得耐嘅關係都幾乾無乜肉汁，個人覺得可以唔洗試。（但朋友之前試過話味道唔錯的）
至於點餐料理方面，同T2唔同，呢到除咗多出牛肝葷蘑菇濃湯之外，牛肉麵亦都係清燉牛肉麵而非T2嘅紅燒牛肉麵。順帶一提，早餐時段會有台灣地道嘅蕃薯粥提供。
係到嗌咗碗清燉牛肉麵試試，意外地比之前係台北國泰貴賓室食過嘅牛肉麵更好食，牛肉無咁多筋之餘，麵亦都非常彈牙，而且湯底都幾好飲，同麵幾夾，唯一可以挑剔嘅就係油咗少少咁。
總結
台北桃園機場環亞機場貴賓室（第1航廈離境大堂C區）優點
- 人流少
台北桃園機場環亞機場貴賓室（第1航廈離境大堂C區）缺點
- 自助熟食選擇較少
雖然如果同T2 A區Lounge比較嘅話，T1 C區呢一間喺熟食方面係失色唔少，除咗冇食物盤蓋住感覺無咁衛生之外，菜式亦都比較少，但係呢到就勝在人流唔多，而且點餐嘅料理都正正常常，係T1登機嘅話嚟C區Lounge都係個唔錯嘅選擇。
貴賓室使用條件
- 持有指定信用卡（例如美國運通Explorer Card、美國運通白金卡、Citi PremierMiles信用卡）
- 持有Priority Pass
- 乘搭合作航空公司的商務艙或頭等艙
- 付費進入（官網訂購US$43）
- 使用Arrture積分兌換貴賓室使用券
–
想用信用卡儲酒店積分、飛行里數或者直接抵銷簽賬，同時又可以去旅行個陣免費入機場貴賓室？新推出嘅美國運通Explorer Card就可以一卡做到！而家就立即申請啦！
申請網址：stillmoney.com/s/Amex.Explorer
–
延伸閱讀：
【貴賓室介紹】台北桃園機場環亞機場貴賓室（第1航廈離境大堂D區）
【貴賓室介紹】台北桃園機場環亞機場貴賓室（第2航廈離境大堂A區）
【貴賓室介紹】台北桃園機場環亞機場貴賓室（第2航廈離境大堂A1區）
