儲蓄送里數
繼渣打定期活期送里數，同埋中銀港航信用卡迎新儲定期送里數之後，又多一間銀行加入呢個開戶行列。大新今次開戶（注意，唔係定期戶口）送Avios，放40萬入去送最多25,000里。
適逢而家金融市場不穩，將資金放喺銀行，勉強算係穩陣補本嘅方法。呢啲係大茶飯，梗係要搶生意，所以銀行用里數做噱頭，都係合情合理。除咗定期利息之外，仲有里數作額外回報，應該可以令唔少人心動。
瘦田冇人耕耕開有人爭，預計繼續會有其他銀行加入送里數，或者我哋會見到有更新奇嘅玩法都未定。始終AM、Avios、FWC都有人送緊，要打入呢個市場都需要啲創意，可能到Citi同DBS出時，會送分畀你自己換里數呢，Who knows？
降低入場門檻都可能會係另一個方向，而家最少都要廿萬先參與到。唔少人對里數有興趣，但鎖死一筆唔細數目嘅錢咁耐，都會令部分人卻步，降低啲易入口啲，慣咗再加碼，我實舉腳贊成。
點都好，銀行出新嘢搶客，某程度上消費者都會受惠，快啲頂爛個市佢啦唔該！
儲蓄送里數邊間好
講開儲蓄送里數，咁就以港幣，簡單啲比較吓3間行啦。
渣打：
最多做一年定期放100萬，送26萬AM
最少做半年定期放20萬，送2萬AM
中銀：
最多做一年定期放100萬，送34.5萬FWC
最少做半年定期放20萬，送2萬FWC
大新：
最少放5萬
每5萬落戶口會有2,525 Avios
最多放40萬落戶口keep三個月，送20,200Avios
假設AM、FWC、Avios一樣價值相近先啦，同樣放20萬，渣打中銀有2萬里，大新得10,100里，不過就放少一半時間，三個月搞掂。除非你放40萬，就做到同樣里數。
到比較有成球嘢喺手嘅Case，中銀明顯係優勝嘅，比渣打多成85,000里。大新唔使講，直頭冇一球Plan。
其實三個計劃都各有特色，大新係低門檻儲蓄戶口，利息你當冇啦，但可以隨時唔玩，入場費只需5萬蚊。
中銀就要先申請到張港航卡，要留意返FWC換到嘅航線較少，至少冇AM、Avios嘅One World咁多，主要去中日韓台泰（話少但其實大部分人都係去呢啲），再加4個美國城市。
渣打送AM就最大路，航線嚟講佢最多，如果有位，唔怕用唔著。而且渣打你唔需要搞埋信用卡，去開戶就得，最簡單。
始終嗰句，按返自己需要同個人習慣去揀啦。
40萬擺半年 換到雙人韓台機票
儲蓄plan換完啲里數用嚟換乜好？
如果有一球，我會揀渣打，因為唔使特登出張信用卡先，同埋佢送AM，換CX頭等開心好多。放一球入去一年有26萬AM，已經可以一家四口出日本trip嘆世界，一程商務一程頭等，或者二人世界頭等去美國都得。只要有錢，乜都唔使點做就爽歪歪。
若果冇咁多，「少少哋」湊夠20萬開戶，擺半年有2萬AM。咁你而家已經可以諗定半年後去日本定韓國定泰國好？2萬AM夠你來回。
湊到多啲錢就自然多啲玩法，20萬渣打做半年，20萬大新放3個月，加埋綁住你40萬幾個月，就有2萬AM加10,100Avios。2萬AM出兩張單程香港-首爾-台北，9,000 Avios補兩張台北返香港單程，就可以出套雙人韓台機票！
其實仲可以有好多變化，重點係有閒錢，而家唔使用錢又有息收又可以去旅行，好事呀。
