機場貴賓室

香港機場禁區入面有19個貴賓室，有啲係航空公司/聯盟都有自己營運嘅，例如國泰有6個堂：

玉衡堂、寰宇堂、逸連堂、玲瓏堂
玉衡堂、寰宇堂各分開頭等同商務兩個廳

港航有2個：遨堂、紫荊堂

新航、泰航、澳航都有自己嘅貴賓室。

除此之外，一定要介紹好出名嘅環亞貴賓室，相信大家一定聽過人講上機前入去排隊食碗魚蛋粉，就係呢間嘢。禁區有3間環亞貴賓室，其中一間係走高檔路線嘅Plaza Premium First，禁區外都有一間係畀抵港旅客用嘅。

另外，仲有間高檔嘢，AE開嘅全亞洲第一間The Centurion Lounge貴賓室。

國泰、港龍或「寰宇一家」嘅商務/頭等乘客
馬可孛羅會銀、金或鑽石卡會員、Cargo Clan Elite會員
「寰宇一家」飛行常客藍寶石或綠寶石會員

如果用會員身份入嘅話，係要搭返同一聯盟One World嘅機先入得。

除咗做高級會員或搭貴Class之外，信用卡都幫到你入去某啲航空公司貴賓室，例如港航有三張聯營信用卡(中銀、建行、工商)，每年都有5次Quota入去，前兩張仲可以帶人入添。

JAL都有張Aeon出嘅聯營卡，不過條款辣啲，要前一年簽滿15萬先可以入得一次，而因為日航冇自己嘅貴賓室，所以要入就係入澳航貴賓室，前提都係要搭返JAL機先得。

除咗銀鑽，AE CX卡都入到PPL，AE CX有兩張，一張Elite，一張普通。Elite可以無限次入，附屬卡卡主都係。普通嗰張就會每年派兩張coupon畀你入，只能夠自己用。

用AE CX Elite仲可以攞埋Priority Pass，包4次Quota去PP嘅貴賓室，而PP網絡遍佈全世界1200個機場（PP香港都有，就係環亞嘅PPL喇）。市面上亦都有好多優先理財戶口會送Priority Pass，你有就會知㗎喇。

另外，由LoungeKey提供萬事達卡機場貴賓體驗(MCAE) 都有提供1000個機場嘅貴賓室Access，World Elite MasterCard級數通常可以免費用到。畀街客申請嘅得一張Citi Prestige卡夠Level啫，而喺香港可以入邊間呢？又係環亞囉。

所以PPL而家係平民貴賓室，成日都大排長龍。貴賓同時又平民？阿媽我好亂呀！

除咗用信用卡/Priority Pass卡入貴賓室之外，仲有龍騰出行都可以入貴賓室，不過唔啱大陸嘢嘅可以唔使睇落去喇。

龍騰出行係一個App，去到貴賓室打開個APP嘟一嘟就入得，其實佢同PP、MCAE都係同類型機構，一樣喺全球各地都有貴賓室網絡，喺香港就可以入港航嘅遨堂同紫荊堂。

ICBC有4張MasterCard係可以用3蚊人仔換到龍騰出行嘅會藉，首選用大灣區MasterCard換，因為主卡同附屬卡卡主都可以無限次入，一年最多各帶6個人入Lounge，呢個都係唔使搭港航機但又入到港航Lounge嘅方法。

又係出動信用卡嘅時間，上面介紹過環亞、Priority Pass、MCAE同龍騰出行都有外國貴賓室嘅網絡。環亞嘅選擇少啲，但港人常去嘅地方都有唔少，亞洲區去台北、新加坡、北京、吉隆坡都會有PPL。遠啲嘅倫敦、羅馬、澳洲都有，揸住張AE CX Elite卡已經可以隨便入。

Priority Pass、MCAE同龍騰出行，基本上數得出嘅機場都會用得著，貴賓室數目Priority Pass會多啲，但龍騰出行相對易攞啲，好睇你目的地去邊而申請。不過佢哋都有個共通點，就係日本網絡差啲啲，下面再同大家分析日本嘅機場貴賓室。

最後出場係JCB白金卡，正宗東洋嘢，佢亦都有提供貴賓室服務，而全香港得東亞一張係白金卡啫。得意嘅係發卡地區嘅卡唔可以入返發卡地區嘅Lounge，例如香港出嘅JCB白金卡喺香港係用唔著，好在日韓、中國、泰國、新加坡同夏威夷都用到。不過韓國、泰國同新加坡一年只可以入兩次，其他地區都係無限次入，留意番AEON嗰幾張唔係白金入唔到㗎。

值得推薦嘅原因係，大家最愛嘅日本係包左28個機場，上至CTS、下至OKA、國際線嘅HND、國內線嘅AXT，大大小小嘅機場都用得著，方便大家返鄉下，另類「回鄉卡」呀。