2020農曆年 換機票情況

冇錯，2019年農曆年開始，就係換2020年農曆年機票嘅時候。冇計啦，除非你唔介意ad-hoc去旅行，否則都真係要咁早book。不過AM換機票呢，真係一年難換過一年，其實而家有啲都要waiting喇，我又即管揀4個熱門地方，包括東京、大阪、北海道同倫敦，寫吓呢一刻嘅換飛情況。

東京篇

成日都話機票好難換要預先換定，特別係日本，真係好緊，一開始梗係講吓2020農曆新年東京換機票嘅情況先啦！Asia Miles去程2020年1月23（年廿九）、25（初一）有得換！不過係頭等，現時仲可以即換唔需要候補。不過係隨心賞嚟，單程已經要130,000miles，其他嘅話就需要候補。

而回程就全部都需要侯補，完全無位，如果大家唔心急嘅話可以候補定。或者睇定啲，睇吓到時會唔會好似今年咁，失驚無神嘔番啲位出嚟。

大阪篇

講完東京，當然到大阪。大阪Asia Miles係農曆新年時間，暫時係冇任何機位可以兌換到！如果想換嘅話只可以候補，睇下遲啲有冇機位。或者考慮吓直接買機票罷啦，就算而家買定，25（初一）去28（初四）返，廉航都係大約$3000左右。而搭傳統航空公司嘅話，印航都只係$3900，計番行李費其實差唔多，個價都合理。

北海道篇

札幌身為熱門嘅兌換航點，農曆新年嘅機位無論去程定回程都係冇嘅！標準賞嘅經濟機位仲要連候補都冇，真係唔講仲以為根本冇出過呢條線。建議大家唔洗對佢有任何期望，好大機會去到最後一刻都唔會放機位出嚟。香港直航去嘅話國泰而家賣緊萬三（你冇睇錯，仲要係經濟），如果真係咁想去札幌過年嘅話，惟有留意吓之後有冇得賣啦，反正都仲有成年時間。

倫敦篇

之前個三篇講日本都係冇機位兌換，或者要頭等隨心賞先有得換，咁嚟到倫敦，到底有冇機位換呢？答案係有嘅，而且仲要好多！

經濟客位：
去程21（年廿七）－24（年三十）經濟有直航，而且仲要係標準賞30000萬就換到。21－23有國泰同英航揀，而24都仲有英航。英航因為係合作夥伴所以要畀多5000里換，而就算25（初一）－27（初三）去程冇直航，都仲有轉機航班供選擇。而回程就27（初三）、29（初五）標準賞換到聯盟成員皇家約旦航空，不過需要轉機。唔想轉機就可以比多少少miles，靈活賞嘅國泰直航數量都幾充足，基本上日日都有位，而且稅仲比要轉機少差唔多7百蚊！

商務：
21－24去程同樣有標準賞而且供應充足，而回程標準賞就得聯盟成員換，而且要轉機
而靈活賞就有國泰揀，而且仲剩好多機位。

頭等：
去程就剩番22（年廿八）有一張標準賞，23－27都有，不過就要靈活賞先換到。而回程就農曆新年期間都要靈活賞先換到，不過就仲剩好多位揀，如果大家唔介意畀多少少里數換嘅話，都不失為一個好選擇。