【貴賓室介紹】名古屋日本航空櫻花貴賓室 Japan Airlines Sakura lounge Chūbu Centrair International Airport
日本航空係Skytrax嘅五星級航空公司，機上嘅服務一向都出名高質素，咁貴賓室又如何呢？今次就帶大家嚟到名古屋中部空港機場嘅 Sakura lounge，係上機之前預先體驗一下日本航空嘅服務。
名古屋Sakura Lounge係現時One World(寰宇一家)喺現時中部空港國際線嘅唯一一間貴賓室，意味著所有乘搭One World Business、First、藍寶石以及綠寶石嘅乘客都集中晒係到，雖然如此，不過入面嘅人流就唔算多。至於服務如何，我地而家就立即一齊睇睇。
位置及開放時間
名古屋日本航空櫻花貴賓室喺出境後向右行大約一分鐘，就會見到專用電梯同升降機前往，地點都幾方便（一來本身名古屋機場都比較細）。貴賓室開放時間為07:45 ～ 22:30。
名古屋日本航空櫻花貴賓室 進入條件
- 乘搭One World寰宇一家航班並且持有藍寶石會員或以上
- 乘搭One World寰宇一家商務艙或頭等艙
- 乘搭Air China、中國南方航空、菲律賓航空、吉祥航空、越南航空
以及深圳航空商務艙、頭等艙或持有其中高級會籍
貴賓室介紹
進入貴賓室檢查完Boarding Pass同埋機票之後就可以正式開始參觀，門口擺放住伊勢神宮式年遷宮（即係每20年就會重建一次內宮以及外宮正殿）時所用到嘅車模型，以及日航嘅飾品。其實整個Sakura Lounge都擺放咗唔少藝術品，有時間又有興趣嘅話不妨逐一欣賞下。
門口兩旁分別放置咗一部影印機以及儲物櫃，儲物櫃係自助形式，由於今次嚟到要去唔同位置影相同拍片，所以就將隨身物品放咗係儲物櫃到，唔洗將啲雜物拎嚟拎去真係方便唔少。
儲物櫃往前行轉右就係辦公區以及電話專用房。
自修室設計嘅辦公區座位，窗外可以望到停機坪。
貴賓室環境，名古屋Sakura Lounge同日航其他Lounge一樣，走簡約高貴路線，周圍都放置咗唔少木系飾品同家具。
貴賓室環境
貴賓室環境
設施方面，貴賓室照舊都係有提供唔同嘅雜誌同報紙，英文嘅刊物都有一兩份提供。
而要講到呢間Sakura Lounge最大嘅特色，相信就係提供免費嘅按摩服務，不過好可惜，呢項服務只會係7:30am-10:30am提供，其他時間並唔開放。
按摩一共有兩邊，除咗按摩椅外，亦都有人手按摩服務，上機前揼番個骨真係幾爽。順帶一提，呢間Lounge並無浴室提供，可以話係名古屋Sakura Lounge最大嘅缺點。
介紹完設置，就到大家最關心嘅飲食，日本嘅日航貴賓室相信酒鬼嚟到就最開心，呢到提供超過二十種酒類飲品，由啤酒到日本酒都有，而且仲係免費任飲添。不過呢到就無Bartender，想飲混合酒就要靠自己調啦。
Sakura Lounge 「The Bar」
Sakura Lounge 「The Bar」
Sakura Lounge 「The Bar」
至於唔飲酒嘅話，其實都有好多選擇，好似眼前呢部熱飲機咁，就有九款唔同嘅飲料供應，我自己就飲咗好多杯Iced matcha latte。
綠茶味濃郁，而且甜度啱啱好。
除此之外，雪櫃亦都有牛奶同蕃茄汁可以拎，至於左下方個芝士難食到即刻Lur，有興趣試伏嘅話都可以一試。
至於食物方面，名古屋Sakura Lounge就比較遜色，除咗日航咖喱飯之外，其他都係一般水準。
曲奇以及三文治
話晒係日本航空貴賓室，呢到當然亦都有壽司供應。
除此之外仲有杯麵、麵吟湯同埋兩種唔同味道嘅萩餅。
至於日航最出名嘅咖喱，呢到就有兩款，分別係牛肉咖喱以及肉醬咖喱。
日航嘅肉醬咖喱特別之處就係由CoCo壹番屋特製，至於味道係典型嘅日式咖喱味，唔辣同埋甜甜地，而且仲幾足料添。
如果有機會嚟到名古屋Sakura Lounge就記得一試啦！
總結
名古屋日本航空櫻花貴賓室 優點
- 有按摩服務
- 酒類飲料數目多不勝數
- 人流唔多
名古屋日本航空櫻花貴賓室 缺點
- 按摩服務只係早上提供
- 除咗咖喱飯之外其他食物都一般
- 無浴室供應
總括而言，日航名古屋日本航空櫻花貴賓室嘅整體水準可以話係中等偏上，最大問題都係食物水準較為普通，至於飲品就相對高水準得多。假如喺日本最後一餐想食好啲嘅話，個人建議都係去番機場其他鋪頭食會比較好。
–
想用信用卡儲酒店積分、飛行里數或者直接抵銷簽賬，同時又可以去旅行個陣免費入機場貴賓室？新推出嘅美國運通Explorer Card就可以一卡做到！而家就立即申請啦！
申請網址：stillmoney.com/s/Amex.Explorer
–
