Fact Check系列 Hilton希爾頓 VISA卡快速升金活動 要用VISA卡付款屬真屬假？
之前介紹過Hilton希爾頓酒店嘅會籍福利，當中有一個Visa Signature 或 Visa Infinite 金會籍 FAST-TRACK嘅活動，如果持有Visa Signature或者Visa Infinite信用卡就可以登記活動，只要係登記後90日內入住Hilton旗下酒店兩次或者四晚就可以升級到金會籍，而金會籍當中最吸引嘅福利就係有免費早餐同埋可以升級客房至行政客房類型。如果未登記嘅就記得快啲登記，因為今日係登記嘅最後一日。
咁今次要Fact Check嘅係咩呢？事緣因為呢個活動係要Visa Signature 或 Visa Infinite登記，而有其他酒店KOL聲稱係要用登記個張VISA卡畀錢先合符活動資格，其實睇條款及細則係並無列明需要用VISA卡畀錢，只係寫Visa Signature 或 Visa Infinite登記持卡入入住兩次或四晚就可緣拎到。
雖然條款同細則好少會寫漏，不過穩陣起見就打咗上去問Hilton客服，得到嘅答案係如果條款無寫嘅話係並唔需要。不過Fact Check緊係親身做最好，所以我就係登記活動之後住咗兩次Hilton酒店，而且特登用非VISA卡埋單。
其中一張帳單，見到最底係用AMEX，同埋其實都係出呢篇文嘅前兩日入住架咋
最終係7月29日同30日分別入住完兩間Hilton嘅酒店之後，就喺7月31日成功升金，因此最終證明係唔需要用登記嘅VISA卡畀錢！希望作為KOL嘅各位以後發佈訊息之前Fact Check，唔好再放咁多流料水讀者。
成功用非VISA卡付款並且入住兩次升金
